RafiWritings

கடந்து போக ஆசைப்படுகிறேன் நான், உங்கள் எல்லாரையும்.. மலர் ஒன்று எப்படி உங்கள் மேல் பட்டும் படாமல் விழுந்து தரையிறங்கியதோ, வானவில் ஒன்று நீங்கள் மொட்டை மாடி வந்த சில நிமிடங்களில் எப்படி மறைந்து போனதோ, விமானம் ஒன்று நீங்கள் பார்த்து கொண்டிருந்த போதே எப்படி காணாமல் போனதோ, எங்கிருந்தோ நீங்கள் தூக்கி எறிந்த அந்த கல் எப்படி குளத்தில் சிறு அதிர்வுகளோடு மூழ்கியதோ, இளையராஜா இசை ஒன்று எப்படி உங்களை ஊடுருவி உள்ளூரக் கடந்ததோ, அப்படி எல்லாம் ஆசைப்படுகிறேன் நான், உங்களை கடந்து போக!!

காதல் வழிய எத்தனையோ இரவுகள் கவிதைகள் படித்து கதைகள் பேசி விட்டாயிற்று.. இன்று இரண்டொரு நிமிடங்கள் பேச உனக்கு நேரமில்லாது போனதில் வருத்தமேதும் இல்லையெனக்கு என்றே நினைத்துக்கொள் நீ!! இருப்பினும் கேட்கிறேன் இன்னொரு முறை இறுதியாக பேசிப் பார்க்கலாம் என, நீயாய்ப் பேசினால் காதல் அழிக்க காரணங்கள் சொல்லிக் கொண்டிருப்பாய், அதனால் நான் பேசவும் சற்று இடம் கொடுத்து மீண்டும் நாமாக வழியென்ன எனப் பேசலாம்.. பேசி முடித்தாயிற்று எனத் தோன்றிய பின் நீயே ஒரு முடிவெடு.. தொலைந்து போனது காதல் தான் என்றால் சொல், காற்றில் தேடி பார்கிறேன்.. உடைந்து போனது இதயம் என்றால் நீ நில், நான் போய்விடுகிறேன் இந்த காற்றோடு.. அமாவாசை வானத்தில் நிலவாய் நீயிருந்தாய் என்னோடு துணையாய், இன்று பௌர்ணமி காலத்தில் கூட இல்லாமல் போனதன் காரணம் இன்றுவரை நானறியேன்!!

பிடித்த பாடல் எதுவென்று கேட்டால் சற்றும் யோசிக்காமல் சொல்கிறேன் உனக்கு பிடித்த பாடலொன்றை! பிடித்த நிறமென்றால் அதுவும் நீ பிடித்ததாய் சொன்ன நிறமே! உனக்கு பிடித்த உணவே பிறகு எனக்கும் பிடித்ததாயிற்று! நீ வாழ விரும்பிய நகரத்தில் எனக்கு வாழ பிடித்திருக்கிறது இப்போது! இப்படி உனக்கு பிடித்தவையெல்லாம் எனக்கும் பிடித்தவையாகிப் போயின எனக்கே தெரியாமல்.. எனக்கு பிடித்தவையென்று உண்மையில் எதுவுமே இருந்ததில்லை உன்னை தவிர!!‍

நீ பார்க்காத படங்களையும், நீ படிக்காத புத்தகங்களையும், நீ கேட்காத இசையையும், நீ போகாத இடங்களையும், நீ ருசிக்காத உணவுகளையும், நீ உணராத காதலையும், உனக்கு அறிமுகப்படுத்துறவங்க, உண்மையாகவே உன் வாழ்க்கைய மாத்துற சக்தி படச்சவங்க !!